११ असार, स्वच्छखबर,काठमाडौं। त्रिभुवन अन्तर्राष्ट्रिय विमानस्थलमार्फत स्तानबुल हुँदै स्वीजरल्याण्ड जान लागेका एक व्यक्तिको साथमा झण्डै ९ किलो चरेश बरामद भएको छ।

विमानस्थलको अन्तर्राष्ट्रिय उडानतर्फ ब्यागेज चेकिङ एरियामा माल्दोभाका नागरिक ४१ वर्षीय डेनिस कुक्रेभीको साथबाट अवैध लागूऔषध चरेश ८ केजी ७ सय ४० ग्राम बरामद भएको लागूऔषध नियन्त्रण ब्यूरोका एसपी चक्रराज जोशीले अनलाइनखबरलाई बताए।

उनका अनुसार कुक्रेभीले आफूलाई अनलाइनमा विदेशी मुद्राको सटहीको काम गर्ने व्यक्तिका रुपमा चिनाएका छन्।

‘ठमेलमा १०० युरोमा चरेश किनेको भनेको छ, हिँड्दै गरेका बेला चाहिन्छ भन्दै सोधेपछि किनेको भनेको छ’, जोशीले थपे, ‘उनी टर्किस एयरलाइन्सको उडानमार्फत स्तानबुल हुँदै स्वीजरल्याण्ड जान लागेका थिए।’

प्रहरीका अनुसार उनको लगेजभित्र फल्सबटम भेटिएको छ, जसमा खैरो रंगको प्लास्किले र्‍यापिङ गरेर चरेश लैजान लागिएको अवस्थामा बरामद गरिएको हो।

उनलाई चरेश विक्री गर्ने व्यक्तिको खोजी भइरहेको ब्यूरोले जनाएको छ।