काठमाडौं । नेपाली कांग्रेसका सांसद रामहरि खतिवडाले प्रधानमन्त्री पुष्पकमल दाहाल प्रचण्डले भारतीय समकक्षी नरेन्द्र मोदीसँग भेट्दा प्रोटोकल बाहिरको ‘नौलो मान्छे’ राखिएको भन्दै जवाफ माग गरेका छन् ।

बुधबारको प्रतिनिधिसभा बैठकको शून्य समयमा सांसद खतिवडाले दुई प्रधानमन्त्रीको भेटमा प्रोटोकल बाहिरको मान्छे राखिएको भन्दै सरकारको जवाफ माग गरेका हुन् । उनले सदन चलिरहेका बेला प्रधानमन्त्रीको विदेश भ्रमणबारे जानकारी नदिएको भन्दै आपत्तिसमेत जनाए ।

उनले भने, ‘ सदन चलिरहेका बेला प्रधानमन्त्री भारत भमणमा जानुभयो । भ्रमण गरेर आएपछि के सदनलाई जानकारी गराउनुपर्दैन ? अनि दुई प्रधानमन्त्रीबीचको वान टु वान भेट्दा प्रोटोकल बाहिरको नौलो मान्छे राखेर बस्नु भएको देखियो, यसबारे पनि जवाफ चाहन्छौ ।’

प्रधानमन्त्री प्रचण्ड र भारतीय प्रधानमन्त्री नरेन्द्र मोदीबीचको भेटमा प्रधानमन्त्री पुत्री गंगा दाहाल सँगै रहेकी थिइन् । उनले दुई प्रधानमन्त्रीको भेटमा छोरी सँगै राखेकोमा आपत्ति जनाएका हुन् । त्यस्तै उनले विदेशी नागरिकता लिने सार्वजनिक पद धारण गर्नेमा व्यक्तिले विदेशी नागरिकता लिएको कुरा आएको छ, यसको छानबिन गरी स्वेतपत्र जारी गर्न माग गरे ।