काठमाडौं । नेपाल काभा महिला भलिबल च्याम्पियनसिपको फाइनलमा पुगेको छ । मङ्गलबार बेलुकी भएको दोस्रो सेमिफाइनल खेलमा इरानलाई ३-० को सोझो सेटमा हराउँदै नेपाल फाइनलमा पुगेको हो ।

राष्ट्रिय खेलकुद परिषद्(राखेप)को कभर्ड हलमा भएको खेलमा घरेलु दर्शकमाझ नेपाल हाबि बनेको हो । पहिलो सेट २५-२१ आफ्नो पक्षमा पारेको नेपालले दोस्रो सेट २८-२६ ले जितेको थियो । यस्तै तेस्रो सेट २५-२० ले जित्दै नेपालले लिग चरणमा भोगेको हारको बदला लिँदै फाइनलको बाटो कोरेको हो ।

अब नेपालले बुधबार हुने फाइनल खेलमा भारतको सामना गर्नेछ । आजै भएको पहिलो सेमिफाइनल खेलमा श्रीलंकालाई हराउँदै भारत फाइनलमा पुगेको थियो ।