काठमाडौं । सामाजिक सञ्जाल र मिडियाले आरोप लगाएकै भरमा गृहमन्त्रीको राजीनामा मागेको भन्दै डा. शेखर कोइरालामाथि सत्तारुढ नेपाली कांग्रेसभित्र प्रश्न उठेको छ ।
सभापति शेरबहादुर देउवाको निवास बूढानीलकण्ठमा सोमबार बिहान बसेको पदाधिकारी र पूर्वपदाधिकारी बैठकमा डा. शेखरलाई स्पष्टीकरण सोध्ने समझदारी बनेको एक नेताले जानकारी दिए ।
डा. शेखर भने उपत्यका बाहिर भएका कारण बैठकमा उपस्थित भएका थिएनन् । आरोप लागेको कर्मचारीमाथि समेत छानबिन सुरु नहुँदै डा. शेखरले गृहमन्त्रीको राजीनामा मागेको विषयमा बैठकमा छलफल भएको छ, यस विषयमा सभापतिजीले बोलाएर सोध्ने भन्ने भएको छ ।
उनले कर्मचारीमाथि लागेको आरोपमा कर्मचारी नै जवाफदेही हुने भन्दै छानबिनले पुष्टि नगरी गृहमन्त्रीको राजीनामा माग्नु गलत हुने बताए । पूर्वमहामन्त्री डा. शशांक कोइरालाले पनि गृहमन्त्री रमेश लेखकमाथि चरित्र हत्या गर्ने र लाञ्छना लगाउने काम भएको बताए । पदाधिकारी बैठकपछि सञ्चारकर्मीसँग कुरा गर्दै कोइरालाले भने, “गृहमन्त्रीले आज जुन कुरा राख्नुभयो म छर्लंग भएँ । एक इन्च पनि उहाँले गल्ती गर्नुभएको छैन ।”
उनले गृहमन्त्रीको राजीनामा माग गर्नेहरूलाई बोलाएर सोध्न सभापति देउवालाई आग्रह गरेको उनले बताए । गृहमन्त्रीको राजीनामा माग्ने पार्टीका नेताहरूलाई बोलाएर सोध्न पार्टी सभापतिलाई भनेका हौँ,’ उनले भने, “एकआपसमा मुठभेड गरेर कांग्रेसलाई फाइदा हुँदैन । शेखर, सुनील र राजेन्द्र बजगाईंसँग स्पष्टीकरण सोध्न भनेका छौँ ।
प्रतिक्रिया दिनुहोस्: