काठमाडौं । महिलाहरूकाे विशेष पर्व हरितालिका तिजको अवसर पारी तराना कला केन्द्र, तराना महिला विकास समिती तथा राष्ट्रिय जनसंगीत कलाकार संघ नेपालले संयुक्त रूपमा “तीज विशेष बृहत् साँस्कृतिक”कार्यक्रम सम्पन्न गरेका छन् ।
तराना कला केन्द्रकी अध्यक्ष वशन्ती लामाको अध्यक्षतामा सम्पन्न कार्यक्रममा गाेकर्णेश्वर नगरपालिकाका प्रमुख दिपक रिसाल र उप-प्रमुख सान्नानी लामाले महिलाहरुको महान चाड तीज कार्यक्रमले महिला शसक्तिकरणको सन्देश दिनुपर्नेमा जोड दिएका छन् । तीजलाई भड्कीलो नबनाई कला, सँस्कृति र माैलिकता बचाउनुपर्ने उनीहरूकाे धारणा थियाे ।
कला संस्कृतिको जगेर्ना गर्न चुनौती बनेको भन्दै नगर प्रमुख रिसाल र उप-प्रमुख लामाले महिलाहरूका लागि महान् मानिने यस पर्व तडक–भडक नभइ सौहार्द वातावरणमा मनाउन समेत सबैलाई आग्रह गरेका छन् । साथै, तराना कला केन्द्र र तराना महिला समितिले गरेकाे कामकाे प्रशंसा गर्दै आगामी दिनमा पनि आफ्नो टाेल छिमेक र नगरका लागि जनचेतनामूलक कार्यक्रमहरू गर्दै जान शुभकामना व्यक्त गर्दै आफुहरूले महिलाको हितको लागि सक्दो सहयोग गर्ने बचन पनि दिएका छन् ।
यसैगरी , कार्यक्रममा राष्ट्रिय प्रथम महिला मादल वादक शुशिला बुढामगरलाई सम्मान गरिएको थियाे । कार्यक्रममा, लोक गायन प्रतियाेगिता, माैलिक लाेक नृत्यका साथै अतिथि कलाकारहरुको प्रस्तुतिमा राताे सारीमा सजिएर उपस्थिति महिला दिदिबहिनीहरूले नाचेर साथ दिएमा थिए ।
प्रतिस्पर्धात्मक नृत्य तथा गीतको निर्णायक समितिले मूल्यांंकन गरी प्रथम, द्वितिय र तृतीय हुन सफल महिला दिदिबहिनीहरूलाई हाैसलास्वरूप प्रशंसा पत्र प्रदान गरिएको थियाे ।
कार्यक्रमकी संयाेजक एवं गायिका बसन्ती लामाले गीत संगीतको संरक्षणका लागि कलाकर्मीहरू एकजुट हुन आवश्यक रहेकाले आफुहरूले यस्ताखाले कार्यक्रम आयाेजना गरेकाे बताईन् । मौलिकता हराउन नदिन र तीजलाई भड्किलो बनाउन नदिन अरुको सिको गर्न त्याग्नुपर्ने भन्दै उनले आफ्ना चर्चित गीतसमेत प्रस्तुत गरेकी थिइन् ।
उनले उपस्थित सहभागिहरुलाई तीजको शुभकामना व्यक्त गर्दै यस्ता कार्यक्रमले आफ्नो संस्कृतिको निरन्तरताका लागि र आपसी सद्भाव कायम राख्न सहयोग पुग्ने बताईन । यस्ता कार्यक्रमबाट आफ्नो धर्म, संस्कृतिको जगेर्ना गर्न र सद्भाव वृद्धि गर्न योगदान पुर्याउने संयाेजक लामाकाे विश्चास छ ।
कार्यक्रममा नगर प्रवक्ता एवं गोनपा ५ का वडा अध्यक्ष नारायण बहादुर सुवेदी, गोनपा ५ का वडा सदस्यहरु लक्ष्मी पुडासैनी, कमला नेपाली, गाेनपा ८ का वडा सदस्य सुमन लामा,राष्ट्रिय ख्याती प्राप्त कलाकारहरू, विभिन्न संघ संगठनका प्रतिनिधि, लगायत स्थानीय महिला दिदिबहिनीहरूकाे उपस्थिति रहेकाे थियाे ।
हिन्दू नारीहरुको पर्व तीजको अवसरमा दिदीबहिनीहरूमा शुभकामना आदानप्रदानसहित दर खुवाउने विशेष कार्यक्रम पनि रहेको थियो । ।
प्रतिक्रिया दिनुहोस्: