काठमाडौँ । सभामुख देवराज घिमिरेले सदनलाई लयमा फर्काउन अपील गरेका छन् । शुक्रबारको प्रतिनिधिसभाको बैठक सुरु हुनासाथ सभामुख घिमिरेले रास्वपा, राप्रपालगायतका प्रतिपक्षी दलले लगातार संसद बहिस्कार गर्दै आएपछि यस्तो बताएका हुन् । उनले सहमतिका लागि आफूले सम्भाव्य सबै पहल र संवादको मार्ग अपनाएको उल्लेख गरेका छन् ।
उनले सदन सुचारु बनाउन सरकार र राजनीतिक दलहरूबीच हुनुपर्ने छलफल र संवाद नभएकोमा चिन्तित रहेको बताएका छन् । त्यस्तै उनले यसरी बैठक सुरु हुनासाथ ‘असहमति प्रदर्शन’ गर्ने र बाहिरिने प्रवृत्ति संस्थागत लोकतान्त्रिक प्रणाली र संसदीय अभ्यासका दृष्टिले दीर्घकालीन रूपमा हानिकारक साबित हुनसक्ने बताए ।
उनले अहिले सङ्घीय लोकतान्त्रिक गणतन्त्रलाई सुदृढ पार्ने प्रयोजनका लागि सङ्घीयतासँग प्रत्यक्ष सम्बन्धित विधेयकहरूलाई पारित गर्ने प्रक्रियामा रहेको भन्दै यी विधेयकहरूमा सबै माननीयको गम्भीर र रचनात्मक बहस अपरिहार्य रहेको बताए ।
प्रतिक्रिया दिनुहोस्: