काठमाडौं । आन्दोलनरत उखु किसानले विरोधका कार्यक्रमलाई थप सशक्त बनाउने भएका छन् । शनिबार माइतीघरमा पत्रकार सम्मेलन गरी उखु उत्पादक महासंघले भदौ २५ देखि राष्ट्रिय राजमार्गहरू अनिश्चितकालीन अवरूद्ध गर्ने घोषणा गरेको हो ।

त्यसका लागि भदौ २५ गते सर्लाहीको हरिवनमा उपस्थित हुन उखु किसानलाई महासंघले आग्रह गरेको छ । महासंघले परिस्थिति प्रतिकूल बन्न नदिन सरकारले उखु किसानलाई उपलब्ध गराउन बाँकी अनुदान रकम विना सर्त तत्काल भुक्तानी गर्न र उखुको मूल्य तोक्दा किसान प्रतिनिधिहरूको सहभागिता सुनिश्चित गर्न पनि माग गरेको छ ।

महासंघले कृषि मन्त्रीसहितको सरकारी वार्ता टोलीसँग तीन पटकसम्म वार्ता भए पनि कुनै निष्कर्षमा पुग्न नसकेको जनाएको छ । महासंघको विज्ञप्तिमा भनिएको छ, ’सरकार भनेको आम जनताको अभिभावक हो तर पटक पटक आम मेहनती किसानलाई धोका दिनु भनेको किसानको आत्म सम्मानमा ठेस पुर्याउनु हो ।’