काठमाडौं । चिकित्सा शिक्षा अभियन्ता डा. गोविन्द केसीले निजी मेडिकल कलेजको सिट संख्या वृद्धि लगायतका निर्णयको विरोधमा सत्याग्रह सुरु गरेका छन् ।

आइतबार धनगढीस्थित गेटा मेडिकल कलेज परिसरमा पत्रकार सम्मेलन गरी डा. केसीले सत्याग्रह सुरु गरेका हुन् । उनले निजी मेडिकल कलेजहरूको सिट वृद्धिले शिक्षाको गुणस्तर खस्किने बताएका छन् ।

सरकारको पछिल्लो निर्णयले विद्यार्थी र जनतालाई लाभ नदिई उल्टै शिक्षा–स्वास्थ्य प्रणाली नै धरापमा पारेको आरोप लगाएका छन् ।

चार बुँदे माग अघि सार्दै केसीले निजी मेडिकल कलेजहरुलाई विद्यार्थी सिट संख्या वृद्धि गर्ने निर्णय तुरुन्त फिर्ता लिन, शुल्क वृद्धि नगर्न, सम्झौता अनुरुप इलाम, उदयपुर र डडेलधुरामा सरकारी मेडिकल कलेज खोल्न र गेटाको मेडिकल विश्वविद्यालयमा तुरुन्त पूर्ण क्षमतामा अस्पतालसेवा र शैक्षिक कार्यक्रम सुरु गर्न माग गरेका छन् ।

त्यस्तै उनले एकीकृत स्वास्थ्य शिक्षा प्रतिष्ठान सम्बन्धि र विश्वविद्यालय र प्रतिष्ठानका पदाधिकारी नियुक्ति मापदण्ड सम्बन्धि ऐन पारित गर्न, ऐन अनुरुप मेडिकल शिक्षालाई गैर नाफामूलक बनाउने र सरकारी अस्पताल लगायत सबै स्वास्थ्य संस्थामा दरबन्दी वृद्धि गर्न लगायतका सबै सम्झौता र मागहरु कार्यान्वयन तथा पुरा गर्न माग गरेका छन् ।