काठमाडौँ । भारतीय सेनाले चलाएको ‘अपरेसन सिन्दूर’ अन्तर्गत पाकिस्तानमा गरिएको हवाई हमलापछि कुपवारामा पाकिस्तानको तर्फबाट फेरि गोलाबारी भएको छ। भारतीय सेनाले पनि जवाफी कारबाही गरेको छ। पाकिस्तानी सेनाले लगातार दोस्रो रात जम्मू कश्मीरको कुपवारा जिल्लाको कर्नाह क्षेत्रमा गोलाबारी गरेको बताइएको छ । दुवैतर्फ कुनै मानवीय क्षति भएको पुष्टि भएको छैन ।

यो घटनाक्रम मंगलबार बिहान करिब १ः०५ बजे भारतीय सेनाले पाकिस्तान र पाकिस्तान प्रशासित कश्मीर (पीओके) भित्र कथित आतङ्कवादी पूर्वाधारहरूलाई लक्षित गरी गरेको हवाई हमलापछि भएको हो। भारतीय स्रोतहरूले नौवटा आतङ्कवादी शिविरहरूमा आक्रमण गरिएको र १०० भन्दा बढी लडाकुहरू मारिएको दाबी गरेका छन्। ती स्रोतहरूले मारिएकाहरूमा जैश-ए-मोहम्मद (जेईएम) का नेता मौलाना मसूद अजहरका दस जना परिवारका सदस्य र चार सहयोगीहरू रहेको र उक्त कारबाहीमा २४ वटा मिसाइल प्रयोग गरिएको दाबी गरेका छन् ।

‘अपरेसन सिन्दूर’ नाम दिइएको यो भारतीय कारबाही अप्रिल २२ मा पहलगाममा भएको आक्रमणको जवाफ भएको बताइएको छ । यो अपरेसनको नाम पहलगाम घटनामा मारिएकाहरूको श्रीमतीहरूको सम्मानमा राखिएको बताइएको छ । प्रधानमन्त्री नरेन्द्र मोदीले ‘अपरेसन सिन्दूर’ मा तीनवटै सेनाको भूमिकाको प्रशंसा गर्दै यो ‘नयाँ भारत’ को प्रतिबिम्ब भएको र राष्ट्रिय भावनालाई ध्यानमा राख्दै यो अपेक्षित प्रतिक्रिया भएको बताएका छन् ।

भारतीय हवाई हमलाको प्रतिक्रियामा पाकिस्तानका प्रधानमन्त्री शहबाज शरीफले पाकिस्तानी संसद्लाई सम्बोधन गर्दै भारतको कार्यलाई ‘कायरतापूर्ण आक्रमण’ को संज्ञा दिएका छन् र बदला लिने वाचा गरेका छन् । सीमामा बढेको यो तनावले दुई परमाणु शक्ति सम्पन्न छिमेकी राष्ट्रहरूबीच क्षेत्रीय स्थिरता र थप द्वन्द्वको सम्भावनालाई लिएर चिन्ता बढाएको छ ।