काठमाडौं । दरबार हत्याकाण्डमा दिवंगत भएका राजपरिवारको सम्झनामा आज गर्न लागिएको दीप प्रज्ज्वलन कार्यक्रम वृहत हुने भएको छ । कार्यक्रममा पूर्वराजपरिवारका सदस्यसँगै राजवादी नेता कार्यकर्ताहरु पनि उपस्थित हुनेछन् । राजसंस्था पुनःर्स्थापनाका लागि गठित संयुक्त जनआन्दोलन समितिले आज राजा वीरेन्द्रको स्मृति दिवस भएकाले आन्दोलनका कार्यक्रमहरु स्थगित गरेको थियो । समितिका संयोजक नवराज सुवेदीले दिवंगत राजपरिवारको सम्झनामा हुने दीप प्रज्ज्वलनमा सहभागी हुन आह्वान गरेका छन् ।

यो कार्यक्रम राष्ट्रिय सरोकार मञ्च नामक संस्थाको आयोजनामा हुन लागेको हो । हिमानी ट्रस्टको फेसबुक पेजमा कार्यक्रमको सूचना दिइएको छ । जसअनुसार बेलुकी कमलादी गणेस्थानमा बेलुकी ६ः३० बजे दीप प्रज्ज्वलन गरिने छ । यसअघि नारायणहिटीभित्रको श्री चतुर्ब्यूह नारायणधाम मन्दिरमा गर्ने भनिए पनि प्रशासनले अनुमति नदिएपछि कमलादी सारिएको हो ।

दीप प्रज्ज्वलनमा काठमाडौं उपत्यकामा उपलब्ध राजपरिवारका सदस्यहरु सहभागी हुनेछन् । पूर्वयुवराज पारस, पूर्वयुवराज्ञी हिमानी, पूर्वनवयुवराज हृदयन्द्रको विशेष उपस्थिति रहने बताइएको छ । पूर्वराजा ज्ञानेन्द्र र पूर्वरानी कोमल भने अहिले झापामा रहेकाले कार्यक्रममा छुटेका छन् । राजावादी नेताहरुले पनि दीप प्रज्ज्वलनमा सहभागी हुने तयारी गरेका छन् । संयुक्त जनआन्दोलन समितिका संयोजक नवराज सुवेदीसहित अन्य पदाधिकारीहरु कार्यक्रममा उपस्थित हुने छन् ।

राप्रपा नेपालका अध्यक्ष कमल थापासहितका केही पदाधिकारी जाने तयारी छ । राप्रपाका अध्यक्ष राजेन्द्र लिङदेनको पनि सहभागिता रहने बुझिएको छ । सो पार्टीका थुप्रै नेता(कार्यकर्ताहरु जाने तयारीमा छन् । जिल्ला प्रशासन कार्यालयले हिजो काठमाडौंका तीन स्थानमा बाहेक सबैतिर निषेधाज्ञा लगाएको छ । साथै, गैरराजनीतिक र धार्मिक प्रकृतिको कार्यक्रम भएकाले हस्तक्षेप नगर्ने उनले प्रष्ट पारे । ‘यो एउटा धार्मिक कार्यक्रम भएको हुँदा निषेधाज्ञा लाग्दैन’, उनले भने, ‘प्रशासनबाट हस्तक्षेपको कुनै तयारी छैन ।’ यद्यपि, धेरै भीड बढेर माहोल बिग्रिएको खण्डमा प्रहरीले हस्तक्षेप गर्न सक्ने उनको भनाइ छ ।