वासिङटन डिसी । अमेरिकी विदेश मन्त्रालयले यसवर्ष ६ हजारभन्दा बढी विद्यार्थी भिसा रद्द गरेको जनाएको छ । मन्त्रालयका अधिकारीका अनुसार ती भिसा अधिकांश कानुन उल्लङ्घन गर्ने विद्यार्थीहरूको रहेको छ ।

भिसाको म्याद सकिएपछि बसिरहनु, आक्रमण, मदिरा सेवन गरी गाडी चलाउने, चोरी गर्ने र आतङ्कवादको समर्थन गर्ने जस्ता अपराध भिसा रद्दका मुख्य कारण हुन् । करिब ४ हजार भिसा कानुन तोड्ने कारण रद्द गरिएको थियो भने दुई हजार आतङ्कवादसम्बन्धी आरोपमा रद्द गरिएको थियो।

यो कदम ट्रम्प प्रशासनको विश्वविद्यालय र विद्यार्थी भिसासम्बन्धी कडाइको भागको रूपमा आएको हो । अधिकारीहरूले गाजामा भएको युद्धविरुद्ध प्रदर्शन गर्ने विदेशी विद्यार्थीहरूलाई विशेष लक्षित गर्दै उनीहरूलाई यहुदी विरोधी र आतंकवादलाई समर्थन गर्ने आरोप लगाएका छन् ।

विदेशमन्त्री मार्को रुबियोले विद्यार्थी भिसा रद्द गर्ने प्रशासनको नीतिको बचाउ गर्दै भने, ‘विद्यार्थी भिसा कुनै संवैधानिक अधिकार होइन। हामीले दिने वा नदिने निर्णय गर्ने हक राख्छौं।’

विदेश मन्त्रालयका अनुसार सन् २०२४ मा करिब ४ लाख विद्यार्थी भिसा जारी गरिएको थियो। नयाँ नियम र आवेदन स्थगनका कारण यसवर्ष जारी हुने भिसाको संख्या कम हुने अपेक्षा गरिएको छ।