काठमाडौँ । सर्वोच्च अदालतले महिलाहरुबाट डिम्ब निकाल्न र भण्डारण नगर्न अन्तरिम आदेश जारी गरेको छ । मंगलबार न्यायाधीश टेकप्रसाद ढुंगानाको इजलासले यसको प्रभावकारी निगरानी र नियमन गर्न सरकारको नाममा अन्तरिम आदेश जारी गरेको हो ।

बबरमहलस्थित होप फर्टिलिटी एन्ड डाइगोनिसिस्ट प्रालिले अवैध रूपमा किशोरीहरूको डिम्ब निकालेर बिक्री वितरण गरेको विषय सार्वजनिक भएपछि यसलाई तत्काल रोक लगाउन माग गर्दै अधिवक्ताहरू निरव ज्ञवाली, ध्रुव भण्डारी र अंकिता त्रिपाठीले रिट दायर गरेका थिए ।

कानुन बनाएर मात्रै महिला तथा किशोरीहरूको डिम्ब निकाल्नु र भण्डार गर्नुपर्ने निवेदकको मागअनुसार न्यायाधीश ढुंगानाको इजलासले आदेश जारी गरेको हो ।

आदेशमा भनिएको छ, ‘बालबालिकाको मौलिक हक संरक्षण गर्नु विपक्षीहरूको संवैधानिक कर्तव्य रहेको, बालिका तथा किशोरीहरूमाथि शोषण हुन सक्ने जोखिम र सुविधा सन्तुलनलाई समेत दृष्टिगत गरी प्रस्तुत रिट निवेदनको अन्तिम टुंगो नलागेसम्म नेपाल राज्यभर महिला तथा बालबालिकाबाट डिम्ब निष्कासन तथा भण्डारण गर्ने कार्यमा रोक लगाई सरकारको नियमन र निगरानी प्रभावकारी बनाउनू भनी विपक्षीहरूको नाममा सर्वोच्च अदालत नियमावली, २०७४ को नियम ४९(२)का बमोजिम अन्तरिम आदेश जारी गरिदिएको छ ।’

सर्वोच्चको आदेशपछि अब डिम्ब निकाल्न र भण्डारण गर्न नपाइने भएको छ ।