काठमाडौं। सशस्त्र प्रहरी बल नेपालले सीमा क्षेत्रबाट हुने चोरीनिकासी पैठारी र अवैध आवतजावत रोक्नका लागि थप कडाइ गर्न मातहतका निकायलाई निर्देशन दिएको छ ।

सशस्त्र प्रहरी महानिरीक्षक राजु अर्यालले आज भर्चुअल माध्यमबाट सीमा क्षेत्रमा तैनाथ सबै तहका युनिट कमाण्डरहरूलाई सीमा सुरक्षासम्बन्धी विविध विषयमा कडाइका साथ कार्यसम्पादन गर्न निर्देशन दिएका हुन् ।

सीमा क्षेत्रमा हुने अवैध चोरी तस्करी नियन्त्रणका लागि मुख्यालयले समेत सूक्ष्म निगरानी गरिरहेको र त्यसमा कतै कमीकमजोरी देखिएमा वा शङ्का लाग्नासाथ कुनै पनि कमाण्डर छानबिन र कारबाहीको भागीदार बन्ने उनले चेतावनी दिए ।

हरेक कमाण्डर मुलुक, आमजनता र सङ्गठनको हितमा विवेक प्रयोग गर्न स्वतन्त्र रहेको स्पष्ट पार्दै उनले असल कार्यका लागि मुख्यालयको आदेशको पर्खाइमा बस्नु नपर्ने बताए।

महानिरीक्षक अर्यालले सीमा क्षेत्रमा कार्य गर्दा अपनाउनुपर्ने आचरणका विषयमा समय-समयमा काउन्सिलिङ गर्दै आचरणविपरीत कार्य गर्ने माथि कठोर हुनसमेत निर्देशन दिए । सीमा क्षेत्रबाट हुने अवैध आवतजावत रोक्नका लागि र शङ्कास्पद व्यक्ति देखिएमा त्यसलाई विशेष निगरानी गर्न तथा सीमा क्षेत्रलाई व्यवस्थित गर्न सधैँ चनाखो बन्न पनि उनले निर्देशन दिए ।