काठमाडौं । नेपाल भ्रमणमा आएकी समाजवादी गणतन्त्र भियतनामकी उपराष्ट्रपति भो थि आन सुआन र परराष्ट्रमन्त्री आरजु राणा देउवाबीच शिष्टाचार भेटवार्ता भएको छ ।
भेटमा नेपालले दुवै मुलुकबीचको साझेदारीलाई अझ प्रगाढ बनाउने विषयमा कुराकानी भएको मन्त्री राणाले जानकारी दिइन् ।
त्यस्तै उनले भेटका क्रममा भियतनामको तीव्र आर्थिक विकास र वृद्धिप्रति बधाई दिँदै नेपालले पर्यटन, व्यापार र लगानीलगायत विभिन्न क्षेत्रमा सहकार्य विस्तार गर्ने इच्छाशक्ति देखाएको बताइन् ।
दुवै मुलुकका उच्च पदाधिकारीबीच गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थलमार्फत उडान सञ्चालन गरी जनस्तरको सम्पर्क बढाउने विषयमा समेत विचार आदानप्रदान भएको थियो । सुआनको यो नेपाल भ्रमण उच्चस्तरीय भियतनामी नेताको पहिलो ऐतिहासिक भ्रमण मानिएको छ ।
तीनदिने औपचारिक भ्रमणका लागि उनी शनिबार काठमाडौं आइपुगेकी हुन् । लगत्तै परराष्ट्रमन्त्री राणासँग मन्त्रालयमा औपचारिक भेटवार्ता भएको हो । उनी उपराष्ट्रपति रामसहायप्रसाद यादवको मैत्रीपूर्ण निमन्त्रणामा नेपाल आएकी हुन् ।
प्रतिक्रिया दिनुहोस्: