काठमाडौँ । झापा निर्वाचन क्षेत्र नम्बर–५ बाट नेकपा एमालेका केपी शर्मा ओलीले उम्मेदवारी दिएका छन् ।

मंगलबार अपराह्न नेता कार्यकर्तासहित दमकस्थित निर्वाचन अधिकृतको कार्यालय पुगेर ओलीले मनोनयन दर्ता गरेका हुन् । ओलीको साथमा कोशी प्रदेशका मुख्यमन्त्री तथा एमाले सचिव हिक्मत कार्की पनि निर्वाचन कार्यालय पुगेका थिए ।ओलीको समर्थक मेनुका काफ्ले र प्रस्तावक रोमनाथ ओली रहेका छन् । ओली अघि नेपाली कम्युनिस्ट पार्टीका उम्मेदवार रञ्जित तामाङले उम्मेदवारी दर्ता गराएका थिए । तामाङ बाहिरिने क्रममा ओलीसँग भेट भएपछि तामाङले ओलीसँग मत माग्न भ्याएका थिए ।

उम्मेदवारी मनोनयअघि सञ्चारकर्मीलाई प्रतिक्रिया दिँदै एमाले अध्यक्ष समेत रहेका ओलीले उम्मेदवारी मनोनयन क्रममा एमालेलाई रास्वपाका कार्यकर्ताले केही डिस्टर्व गर्न खोजेको बताए । उनले शान्तिपूर्ण चुनाव गर्न सरकारको ध्यान जानुपर्ने भन्दै झापाका पाँच वटै निर्वाचन क्षेत्रमा एमाले उम्मेदवार निर्वाचित हुने दाबी गरे ।

साथै ओलीले झापा -५ मा आफू झण्डै डवल मतान्तरले निर्वाचित हुने दाबी गरे । झापा–५ मा रास्वपाबाट बालेन शाह र नेकपाबाट रञ्जित तामाङ लगायतले पनि उम्मेदवारी दर्ता गराइसकेका छन् ।