काठमाडौं । नेपाल भ्रमणमा रहेका भारतीय विदेशसचिव विक्रम मिश्रीले प्रधानसेनापति अशोकराज सिग्देलसँग भेटवार्ता गरेका छन् । सोमबार बिहान जंगीअड्डा पुगेर विदेश सचिव मिश्रीले प्रधानसेनापति सिग्देलसँग भेटवार्ता गरेका हुन् ।

भेटका क्रममा दुईपक्षीय हितको विषयमा कुराकानी भएको सैनिक जनसम्पर्क निर्देशनालयले जनाएको छ । प्रधानमन्त्री केपी शर्मा ओलीलाई भारत भ्रमणको निम्ता दिन आइतबार विदेशसचिव मिश्री काठमाडौं आएका हुन् ।

उनले आइतबार नै प्रधानमन्त्री केपी शर्मा ओली, राष्ट्रपति रामचन्द्र पौडेल, नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, परराष्ट्रमन्त्री डा. आरजु राणालगायतसँग भेट गरेका थिए । उनी आज स्वदेश फर्किने कार्यक्रम छ ।